18 juin 2007
PÎRE D'ASSES
Pîre d'asses (Pierre d'astre)
(Gauditiaubois-Musique et musiciens :
Alain Neffe, clarinette, synthé, tapes, mixage ;
Daniel Malempré, guitares ;
Nicolas Hersart de la Villemarqué, sitar, senzas).
_Macintosh_HD_Desktop_Folder_02___Pire_d_asses___N_2CBF5
PÎRE D'ASSES.
Kand dins l'gnût, dj'a peû, dji scrî dès mots su'ne
fouye sins-âme.
Come ène fleûr dè papî, èl powézîye crèche
Èt l' powéte n'èst k'in rayeû d'dintèles gâtéyes.
Dji n'sé né mougnî l'dûr boukè d'tchau k'èst l'dandjî
d'm'èdalér miérseû.
Dji vou trouvér stèllale ki m'tûwra!
Dji scrî pou k'èl vèrité n'fuche né pièrdûwe au coron
d'rén.
Dji vou maçnér m'maleûr avou dès grossès roudjès
brikes
Su lès fondacions scavnéyes dins m'keûr
Pauzès longs dints dès sansûwes des sintumints
Yè l'rabiati tous lès djoûs avou m'rancune étèrnèle!
Dji n'wè né d'autès-èscapes, dji seû dins-in tournikè
d'uch' sèréyes,
Dins-in trèmèlia d'trapes-a leûps, in moncha
d'mannètès lokes
Èt conte vint èt bîje, dji m'èvolré come in mouchon
lib',
A grands côps d'pleume su l'papî, dins l'èmacralâdje
dès mots!
Dilè l'richo, l'solia fét crèche ène fleûr,
Noulu n'vout l'vîr! Fèyèz-èfèk di nè l'èspotchî!
Min t'a n-in côp, èle s'è-st-èvoléye lon d'nos peûs!
Lès nwêrès cotes dès macrales sont st-èvoye in fumière
Èt l'gnût va béjî l'vizâdje dès bèles èt leûs tchfias
d'panèsse.
Parèyes-a dès mamzèles d'oûr,
Èles tchantnut dins lès dréves du tchèstia.
Èles satchnut dès makès d'amoûr avou leûs-ardiès...
Come si dès flames consomrit lès-âbes,
Dès fèlès lumrotes blinknut
Yè l'blanke dame s'a muchî padzou lès couches
florîyes.
Dji wè lès-èstwèles spitant-au dbout d'ès baguète.
Èl gnût finit, c'èst d'dja d'mwin!
Èl vint gonfèle lès vwèles di l'amoûr,
C'èst bia d'vos vîr bèrlondjî dins l'breune!
Lès tènes batias ki chûvnut l'filè dès-eûwes passnut
sins brût,
On n'ètint k'èl toktâdje di nos keûrs,
Èles di pauvion dins nos coûrps roubliyîs.
Dins l'timps, lès nuléyes courît lèdjîres dins l'bleuw
du cièl,
Leûs-ombions s'discoupît su l'dûrte têre,
Lès mouchons d'passâdje volît viè l'solia,
Sins-in criyâdje, sins-in crinnâdje, sins peû!
On n'dè crwèyeut né sès-ascoutoûs, ni sès-îs-èwarés
Dins l'fa dès doréyès rayîyes!
Lès pîres diswotéyes dès tchèstias, tchèstias
d'cautes,
Cautes d'agoneûs, d'faustriyeûs,
Nè pavnut pus lès voyes dès moûrts au triviè dès
têres-a tri.
Èles pètnut come dès campes, come dès balons
d'savnéye.
Au katième apas dès montéyes dèl bièstrîye,
Lès cèkes dè bos skètnut, lès poupènes-ètou.
I n'wèt pus l'luweûr, drole d'alumwêre ki fouteut
l'feu,
Ènawére, auzès grijès pikètes du djoû!
Kand l'mouchon d'paradi s'èvole,
Lès couleûrs ridnut dès nuléyes èt rimplichnut lès
voyes..
Lès timps fèynut toubak! Adon, ki conét s'no?
Ara-t-i lès moules di s'èdalér tèrchèdon k'lès-agayons
diabolikes
Du soktâdje mècanike dès djins sètchîs-au solia dès
dèzêrts di sé
Né vouront né l'lèyî survîkî dins l'marache glumiante
dèl vile.
Poûve Monde! Il èst moûrt èy'i n'vout né sawè
Kè moulon va l'mougnî dusk'au bout d'sès foûrces.
I n'vout pus rén sawè, il a trop bwèvu d'drole di
goute
Pou conprinde voltî l'moûrt ki vénra l'ké.
I n'vout né crèvér tout d'chûte, sale bièsse,
I dwèt continûwér s'tafiâdje conte li-minme
Èyè lès mots n'manknut né, azâr!
I d'meureut voltî moya min dwèt-ûlér s'rancune
Padvant l'murwè spiyî du Timps...
Rén n'èst pus grandiveû
K'èl sôcièté dès spèpieûs d'sintumints,
Dès pousse-pou-tchîr du scrijâdje...
Ki rcassra l'atake dès mouchons d'flames
Evoyîs pauzès dieuws-énèrvants?
Ki sèrra l'uch auzès saloprîyes dès barakîs
Ki funkiynut dins lès caufes dès cabarèts-bougnous.
Faura-t-i-z-in sèrvice di bisbrouye pou stoupér,
A grands côps d'martia moya, avou dès clôs d'vûde,
Lès crayes-èfoncéyes pauzès vâgues
Disbrîjantes dès-ocèyans d'bèzinâdjes?
I n'pout pus prinde in seûl tchimwin, i s'soye in mile
boukès
Èt trâwe dès voyes au triviè dès tèris, dès montagnes
di stron d'l'Univêr'...
Univêr' ki n'chène né conprinde lès condicions nuzome
d'ès vikâdje.
Ki li donra l'inspiracion distrûjante dès
balinnes-èskèteûses
Di batia d'pirates au drapia nwêr èt tièsse di moûrt
èt blancs-ochas,
Diszaviré pauzès kate vints dèl roûze du minme no?
I ratint,
Ène pleume dins s'mwin,
L'moumint d'ès finichmint
Pou scrîre in tèstamint,
Min d'vant d'moru,
Sès feumes binaméyes,
I vout co lès vîr voltî
Pour in dérin côp.
I ratint,
Ène pleume dins s'mwin,
L'moumint d'ès finichmint
Pou scrîre in tèstamint,
Min d'vant d'moru,
Sès feumes binaméyes,
I vout co lès vîr voltî
Pour in dérin côp.
Come si l'têre s'èspiyreut in pètûres di roke in
fuzion,
Rén n'èst pus vrèye k'èl rèyalité drwète èt bètchûwe
Strikant d'l'armur' d'aci d'sès-idéyes.
In d'zîr di bouneûr rèssère sès djèsses
Èt distrûre leû pouvwêr tout candjant sès mwins-in
pîre.
Come i n'a wére di grès dins s'cèrvia,
I n'pout né cachî s'voye patavau l'timps,
Il è-st-oblidjî d'prinde dès pîssintes plinnes
d'arokes,
I n'sét pus rotér, a chake adjomblure,
I tchét yè s'èrlèvér pou co toudi rtchér' èt rtchér' !
Nè'ne seûle crossète dins l'grand tram,
Dins l'rime-rame d'ès malaujîye vikérîye!
I dwèt fé chènance di d'meurér stampé
Maugré k'ès néz sangne dins l'richo.
I voureut télmint k'on rmarke k'il èst moûrt
Èt k'èl fostî l'insèvliche adon
Padzou lès-ièbes-èt lès fouyas d'l'Univêr',
Min lès djins spotchnut s'cadâve sins l'vîr.
Il è-st-in fantôme ki trinne sès solés avau l'pavéye
Dèl pèzante Autorité, sès smèles sont trâwéyes
Èt pauzès crayes s'èscapnut lès bauyes di sès ôrtias
Naujîs pauzès longs turpinâdjes padvant l'solia dju
Dès coumères ki l'vîront invi,
Toudi, toudi, toudi, toudi, toudi !
Dès molins-a vint toûnnut dins l'tirant d'sès-idéyes
Turbinéyes dins l'toûrnwêre d'ès tièsse:
"Ki li donra l'foûrce d'ègzistér yè vikî dins l'monde
Ki djouwe ène dérène caute sins vîr lès trèyins ki
l'ratindnut?"
Rén n'èst pus bia k'èl fleûr flawîye
Ki spanit dins dès pichelotes d'alcol
Èt n'sét né k'èl scrijeû d'meure miérseû.
Parèye a l'blanke èstwèle ki florit maulvau
Su l'falîje di tous lès djoûs,
Il-è-st-èvoye su l'autobus' dès nwêrès-èspècheûrs,
Il a seûlemint pièrdu l'tchimwin dès mile grâces
Èt lauvau, au lon, il a vèyu passér l'dérin n-amoûr
d'ès n-avni!
I s'dimande si l'èskèteûse dès potales
Lira sès routes di bias mots spitants...
I s'dimande si l'èskèteûse dès potales
Lira sès routes di bias mots spitants...
Lès seûls vrèyes-artisses tchantnut dès-èrs di
maleûr...
C'èst dè yun!
I wèt voltî l'irèyalité dès-èrvènants
Èdjalés d'vèrzin courant dès cayâdjes disbautchants!
Kand-i sra vî, kétefîye, conpèrdra-t-i
Lès dalâdjes dès-assotis
Yè l'monde calmuchant dès-assazins
Pièrdu k'il-èst padzou lès bèrikes di solia du
vintième sièke?
Si vos n'sarîz né l'vikérîye,
Conbatreut-i lès-inocints moûrtèlemint coutchîs,
Su l'monumint dès biéstrîyes,
Su l'monumint dès "Poukwè dji vos wè voltî, blanke
saloprîye?"?
Come si l'têre s'èspiyreut in pètûres di roke in
fuzion,
Rén n'èst pus vrèye k'èl rèyalité drwète èt bètchûwe
Strikant d'l'armur' d'aci d'sès-idéyes...
Paroles : A.GAUDITIAUBOIS.
Musique : MALEMPRE/NEFFE/VILLEMARQUE.
------------------------------------------------------------
Qui le veut m'envoie un message avec son adresse mail
et je lui envoie un mp3 de meilleur qualité.
André Gauditiaubois
agauditiaubois@yahoo.fr
Publicité
Publicité
Commentaires